اعظم_نذیر_تارڑ

منصور احمد, August 25,2026

اسلام آباد (نیوز اینڈ نیوز) — 25 اگست 2026ء

وفاقی وزیر برائے انسانی حقوق سینیٹر اعظم نذیر تارڑ نے کہا ہے کہ حکومت اقلیتوں کے حقوق کے تحفظ اور فروغ کے لیے متعلقہ برادریوں کے نمائندگان کے ساتھ مشاورت سے تمام قانونی و پالیسی امور پر عملدرآمد جاری رکھے گی۔

نیشنل لابنگ ڈیلیگیشن برائے اقلیتی حقوق کے وفد سے ملاقات کے دوران کرسچن میرج اینڈ ڈیوورس بل، کرسچن پرسنل لاء، تعلیمی و روزگار کے مساوی مواقع، اور اقلیتوں کے ساتھ امتیازی سلوک کے خاتمے پر تفصیلی تبادلہ خیال کیا گیا۔ وفد نے مسیحی خواتین کے شادی و طلاق سے متعلق حقوق کے تحفظ کے لیے موثر قانونی فریم ورک کی ضرورت پر زور دیا جس پر وفاقی وزیر نے مکمل تعاون کا یقین دلایا۔

سینیٹر اعظم نذیر تارڑ نے وفد کو ‘نیشنل کمیشن فار مائنارٹیز رائٹس’ کے قیام سے متعلق جاری قانون سازی اور پیش رفت سے آگاہ کرتے ہوئے کہا کہ اقلیتوں کے حقوق کا تحفظ حکومت کی ترجیح ہے اور اس سلسلے میں تمام نمائندگان کی تجاویز پر سنجیدگی سے غور کیا جائے گا۔

منصور احمد, August 24,2026

اسلام آباد (نیوز اینڈ نیوز) — 24 اگست 2026ء

وفاقی وزیرِ قانون و انسانی حقوق سینیٹر اعظم نذیر تارڑ نے راولپنڈی میں حنا جاوید کے وحشیانہ قتل کے واقعے پر قومی اسمبلی میں اہم پیش رفت سے آگاہ کرتے ہوئے عزم کا اظہار کیا ہے کہ ملزمان کو سخت ترین سزا دلا کر کیفرِ کردار تک پہنچایا جائے گا اور حکومت اس کیس کی قانونی پیروی خود کرے گی۔

قومی اسمبلی میں تفصیلی بیان دیتے ہوئے وزیرِ قانون نے بتایا کہ مقتولہ حنا جاوید قومی اسمبلی میں فرائض انجام دیتی رہی ہیں، اس لیے اس دلخراش واقعے پر فوری ایکشن لیتے ہوئے پنجاب حکومت، ریجنل پولیس آفیسر (آر پی او) اور سی پی او راولپنڈی سے فوری رابطہ قائم کیا گیا۔ انہوں نے ایوان کو بتایا کہ پولیس نے کارروائی کرتے ہوئے دو بنیادی ملزمان کو گرفتار کر لیا ہے جو فی الوقت تین روزہ جسمانی ریمانڈ پر پولیس کی تحویل میں ہیں۔

سینیٹر اعظم نذیر تارڑ نے مزید بتایا کہ پنجاب کے پراسیکیوٹر جنرل کو خصوصی ہدایت جاری کر دی گئی ہے، جنہوں نے کیس کی شفاف اور مضبوط تفتیش کے لیے ایک مخصوص پراسیکیوشن ٹیم تشکیل دی ہے جو معاملے کی خود نگرانی کر رہی ہے۔ انہوں نے یقین دہانی کرائی کہ قائمہ کمیٹی برائے داخلہ اور ویمن کاکس کو وزارتِ قانون و انسانی حقوق کی جانب سے تمام تر مطلوبہ قانونی و انتظامی معاونت فراہم کی جائے گی تاکہ مظلوم خاندان کو بلا تاخیر انصاف کی فراہمی ممکن بنائی جا سکے۔

منصور احمد, August 17,2026

اسلام آباد (نیوز اینڈ نیوز) — 17 اگست 2026ء

وفاقی وزیر برائے قانون و انصاف اور انسانی حقوق سینیٹر اعظم نذیر تارڑ نے ایوانِ بالا (سینیٹ) کے اجلاس میں خطاب کرتے ہوئے کہا ہے کہ آئین و قانون کی نظر میں ملک کا ہر شہری اور قیدی برابر ہے، لہٰذا بانی پی ٹی آئی عمران خان کے لیے کسی بھی قسم کی خصوصی سہولت یا الگ قانون کا مطالبہ آئین کے خلاف ہے۔ سینیٹر اعظم سواتی کی جانب سے اٹھائے گئے نکات کا جواب دیتے ہوئے انہوں نے واضح کیا کہ ملک کا نظام قانون اور ضابطے کے تحت چلتا ہے اور کسی بھی فردِ واحد کے لیے الگ سے قوانین وضع نہیں کیے جا سکتے۔

وزیرِ قانون نے پارلیمانی قوانین کا حوالہ دیتے ہوئے کہا کہ جیل میں ملاقاتوں اور دیگر سہولیات کے لیے واضح قواعد و ضوابط موجود ہیں اور بانی پی ٹی آئی کی ملاقاتوں کا معاملہ اس وقت سپریم کورٹ اور اسلام آباد ہائی کورٹ میں زیرِ سماعت ہے۔ انہوں نے بتایا کہ سپریم کورٹ میں اوپن کورٹ سماعت کے دوران بانی پی ٹی آئی کے وکیل سلمان صفدر نے عدالت کے معاون کے طور پر جو رپورٹ پیش کی تھی، اس میں جیل کے اندر خوراک، صفائی، ورزش کے اوقات اور سیل کی سہولیات کا تفصیلی ذکر موجود ہے۔

اعظم نذیر تارڑ نے آئین کے آرٹیکل 25 کا حوالہ دیتے ہوئے کہا کہ جب آئین تمام شہریوں کو برابر حقوق دیتا ہے تو پھر کسی ایک قیدی کو ایسی خصوصی سہولتیں کیسے دی جا سکتی ہیں جو عام قیدیوں کو میسر نہیں۔ انہوں نے کہا کہ اگر بانی پی ٹی آئی کو ان کی پسند کے ڈاکٹر سے علاج یا دیگر انفرادی مراعات دی گئیں تو یہی حق ملک کی جیلوں میں بند ہر عام قیدی کو دینا پڑے گا۔ انہوں نے مزید کہا کہ جو اصول اور قوانین عمران خان کے لیے ہیں، وہی نواز شریف اور بلاول بھٹو زرداری سمیت ہر سیاسی رہنما اور عام شہری کے لیے بھی یکساں ہیں۔ انہوں نے سینیٹرز اور قانون سازوں پر زور دیا کہ وہ پہلے قوانین کا جائزہ لیں اور آئین کے دائرے میں رہتے ہوئے بات کریں۔

منصور احمد, August 05,2026

اسلام آباد (نیوز اینڈ نیوز) — 5 اگست 2026ء

وفاقی وزیر برائے قانون، انصاف و انسانی حقوق سینیٹر اعظم نذیر تارڑ نے کہا ہے کہ 5 اگست 2019ء کے بھارتی یکطرفہ اقدامات نے نہ صرف خطے کی صورتحال کو ایک نئے اور حساس مرحلے میں داخل کیا بلکہ جموں و کشمیر کے عوام کے بنیادی حقوق، منفرد شناخت اور مستقبل سے متعلق اہم قانونی و انسانی پہلوؤں کو عالمی سطح پر مزید نمایاں کر دیا ہے۔ انہوں نے حکومتِ پاکستان اور پوری پاکستانی قوم کی جانب سے مقبوضہ جموں و کشمیر کے غیور عوام کے ساتھ مکمل اور غیر متزلزل یکجہتی کا اظہار کیا ہے۔

یومِ استحصالِ کشمیر کے موقع پر اپنے خصوصی پیغام میں وفاقی وزیر سینیٹر اعظم نذیر تارڑ نے کہا کہ آج کا دن پوری دنیا کو یاد دلاتا ہے کہ جموں و کشمیر کے عوام کئی دہائیوں سے بے پناہ مشکلات، شدید غیر یقینی صورتحال اور اپنے بنیادی انسانی حقوق سے متعلق سنگین چیلنجز کا سامنا کر رہے ہیں۔ انہوں نے واضح کیا کہ کشمیریوں کی امن، انصاف اور اپنے جائز حقوق کے حصول کی مسلسل خواہشات عالمی برادری اور انسانی حقوق کی عالمی تنظیموں کی سنجیدہ توجہ کی متقاضی ہیں۔

وفاقی وزیر برائے انسانی حقوق کی حیثیت سے انہوں نے اپنے پختہ یقین کا اعادہ کرتے ہوئے کہا کہ انسانی حقوق آفاقی، ناقابلِ تقسیم اور ہر انسان کا بنیادی حق ہیں، اور دنیا کے ہر فرد کو بلاامتیاز عزت، مساوات، آزادی اور قانون کے مساوی تحفظ کے ساتھ زندگی گزارنے کا بنیادی حق حاصل ہے۔

انہوں نے زور دیا کہ پاکستان اپنے اس اصولی اور قانونی مؤقف پر قائم ہے کہ جموں و کشمیر کے مسئلے کا دائمی، منصفانہ اور پائیدار حل صرف اقوامِ متحدہ کی سلامتی کونسل کی متعلقہ قراردادوں اور کشمیری عوام کی آزادانہ خواہشات کے مطابق ہی ممکن ہے۔ سینیٹر اعظم نذیر تارڑ نے اعادہ کیا کہ پاکستان کشمیری عوام کی اخلاقی، سیاسی اور سفارتی حمایت ہر سطح پر جاری رکھے گا اور ان کے بنیادی حقوق کے تحفظ کے لیے تمام مناسب بین الاقوامی فورمز پر اپنا مؤثر کردار ادا کرتا رہے گا۔

ان کا مزید کہنا تھا کہ یومِ استحصالِ کشمیر پر ہم انصاف، انسانی وقار، امن اور قانون کی بالادستی کے لیے اپنے عزم کی تجدید کرتے ہیں اور دعا گو ہیں کہ وہ دن جلد آئے جب جموں و کشمیر کے عوام مکمل امن، آزادی اور وقار کے ساتھ اپنی زندگی بسر کر سکیں۔