اسلام_آباد_خبریں

منصور احمد, August 02,2026

اسلام آباد (نیوز اینڈ نیوز) — 2 اگست 2026ء

ماضی میں شدید رش اور طویل قطاروں کے لیے معروف شملہ پہاڑی نادرا رجسٹریشن سینٹر لاہور میں ایک غیر معمولی اورمثالی تبدیلی دیکھنے میں آئی ہے، جہاں اب شہریوں کو تیز تر، موثر اور باوقار انداز میں عام خدمات فراہم کی جا رہی ہیں۔

یہ ڈرامائی اور مثبت تبدیلی وفاقی وزیر داخلہ محسن نقوی کے شملہ پہاڑی میں قائم 24/7 نادرا سینٹر کے اچانک اور غیر اعلانیہ دورے کے دوران سامنے آئی، جہاں انہوں نے اپ گریڈ شدہ جدید سہولیات اور ہموار آپریشنز کا خود جائزہ لیا اور خوشگوار حیرت کا اظہار کیا۔ جہاں پہلے گھنٹوں کا انتظار اور لمبی قطاریں اس مرکز کی شناخت ہوا کرتی تھیں، وہاں اب شہری آرام دہ، مکمل ایئر کنڈیشنڈ ماحول میں چند منٹوں کے اندر شناختی کارڈ اور دیگر سرکاری دستاویزات کا حصول ممکن بنا رہے ہیں۔

دورے کے دوران وفاقی وزیر داخلہ محسن نقوی نے مرکز میں موجود شہریوں سے بلا واسطہ گفتگو کی، رجسٹریشن کے عمل، وقت کی بچت اور سروس کے معیار کے حوالے سے استفسار کیا۔ شہریوں نے اپنے تجربات بیان کرتے ہوئے بتایا کہ ان کا کام بلا تاخیر محض چند منٹوں میں مکمل ہوا اور عملے کی پیشہ ورانہ مہارت و خوش اخلاقی قابلِ ستائش ہے۔ ایک بزرگ خاتون اور شہریوں نے بہترین و باعزت سلوک پر وزیر داخلہ اور نادرا عملے کے لیے دعائیں اور نیک تمناؤں کا اظہار کیا۔

محسن نقوی نے فیملی رجسٹریشن سرٹیفکیٹ کے حصول کے لیے آئے دو شہریوں کی درپیش مشکلات کا موقع پر ہی نوٹس لیتے ہوئے فوراً ازالے کی ہدایات جاری کیں۔ انہوں نے ہدایت کی کہ شہریوں کو درکار دستاویزات کی درست رہنمائی فراہم کی جائے تاکہ کسی کو بلاوجہ کے چکر نہ کاٹنے پڑیں۔ مزید برآں، سینٹر کے باہر پارکنگ اٹینڈنٹس کی جانب سے زائد فیس وصولی کی عوامی شکایت کا نوٹس لیتے ہوئے انہوں نے متعلقہ حکام کو فوری ایکشن لینے کی ہدایت کی۔

وزیر داخلہ محسن نقوی نے گفتگو کرتے ہوئے کہا کہ “شہریوں کا اعتماد اور اطمینان ہی کسی سرکاری ادارے کی حقیقی کامیابی کا سب سے بڑا پیمانہ ہوتا ہے۔” انہوں نے اس مثالی تبدیلی اور اصلاحات کے نتائج پر چیئرمین نادرا اور ان کی پوری ٹیم کی لگن، محنت اور بہترین عوامی خدمات کی فراہمی پر ان کی کوششوں کو زبردست الفاظ میں سراہا۔

منصور احمد, August 02,2026

اسلام آباد (نیوز اینڈ نیوز) — 2 اگست 2026ء

اسلام آباد پولیس سٹی زون نے گزشتہ ماہ جولائی کے دوران جرائم پیشہ عناصر کے خلاف سخت اور مسلسل کارروائیاں کرتے ہوئے 13 گینگ ارکان اور 86 اشتہاری مجرمان کو گرفتار کر لیا ہے۔ پولیس نے گرفتار ملزمان کے قبضے سے ڈیڑھ کروڑ روپے سے زائد کا مالِ مسروقہ، طلائی زیورات، منشیات اور ناجائز اسلحہ برآمد کر لیا ہے۔

ایس پی سٹی زون ڈاکٹر ایاز حسین کے مطابق سٹی زون پولیس نے جولائی کے مہینے میں جرائم پیشہ گروہوں کے 13 اہم ارکان کو حراست میں لیا۔ گرفتار ملزمان کے قبضے سے 1 کروڑ 50 لاکھ روپے سے زائد مالیت کا مسروقہ سامان برآمد کیا گیا، جس میں 90 لاکھ روپے سے زائد کے طلائی زیورات، 4 لاکھ روپے نقد رقم، 2 موٹر سائیکلیں، 13 قیمتی موبائل فونز، لیپ ٹاپس اور بیٹریز شامل ہیں۔ اس کے علاوہ ملزمان سے وارداتوں میں استعمال ہونے والا ناجائز اسلحہ اور ایمونیشن بھی برآمد کیا گیا ہے۔

پولیس کے مطابق اسی عرصے کے دوران مختلف سنگین جرائم میں ملوث 86 مجرمانِ اشتہاری اور سابقہ ریکارڈ یافتہ ملزمان کی گرفتاری بھی عمل میں لائی گئی ہے۔

ایس پی سٹی ڈاکٹر ایاز حسین نے بتایا کہ جرائم پیشہ عناصر کی نشاندہی اور گرفتاری میں جدید ٹیکنالوجی کا موثر استعمال کیا گیا ہے۔ انہوں نے واضح کیا کہ گرفتار ملزمان کے خلاف ٹھوس شواہد کے ساتھ چالان عدالتوں میں پیش کیے جائیں گے تاکہ انہیں قرار واقعی سزا دلائی جا سکے، جبکہ برآمد شدہ تمام سامان قانونی طریقہ کار کے تحت اصل مالکان کے حوالے کر دیا گیا ہے۔

کاشف عباسی , August 01,2026

اسلام آباد (نیوز اینڈ نیوز) — 1 اگست 2026ء

وفاقی تحقیقاتی ایجنسی (ایف آئی اے) کے اینٹی کرپشن سرکل اسلام آباد نے مین جی ٹی روڈ، روات میں واقع کھوکھر پلازہ کے مقابل ایک بڑی اور غیر قانونی فارماسیوٹیکل پروڈکشن اور اسٹوریج فیکلٹی پر اچانک چھاپہ مار کر احاطے کو مکمل طور پر سیل کر دیا ہے۔

ترجمان ایف آئی اے کے مطابق یہ کارروائی خفیہ اطلاع پر عمل میں لائی گئی۔ چھاپے کے دوران موقع سے 14,961 مختلف اقسام کی گولیاں، 500 انجیکشنز، مختلف برانڈز کے 20,900 سیرپ اور 4,630 مختلف کریمز برآمد کی گئیں۔ اس کے علاوہ غیر قانونی تیاری میں استعمال ہونے والے 15 لاکھ خالی ہارڈ جیلاٹن کیپسول شیلز، 1,072 کلوگرام خام مال، 66,258 خالی بوتلیں، ایکٹو فارماسیوٹیکل انگریڈیئنٹس ، نیوٹراسیوٹیکل خام مال، پیکنگ میٹریل، فزیشن سیمپلز اور دوا سازی کی جدید مینوفیکچرنگ و پیکنگ مشینری بھی بحقِ سرکار ضبط کر لی گئی۔

تفتیشی ٹیم کے موقع پر معائنے سے انکشاف ہوا کہ اس غیر قانونی فیکٹری میں ڈرگ ریگولیٹری قواعد و ضوابط، گڈ سٹوریج پریکٹسز اور گڈ ڈسٹری بیوشن پریکٹسز کی سنگین ورزیاں کی جا رہی تھیں۔ ادویات کی معیار، حفاظت اور افادیت کے لیے قانون کے مطابق درکار درجہ حرارت اور دیگر ضروری تکنیکی شرائط کا سرے سے کوئی اہتمام نہیں کیا گیا تھا۔

کارروائی کے دوران موجود فیڈرل ڈرگ انسپکٹر نے ڈرگ ایکٹ کے تحت موقع سے ادویات اور خام مال کے نمونے حاصل کر کے لیبارٹری تجزیے کے لیے ارسال کر دیے ہیں، جس کی حتمی رپورٹ سامنے آنے کے بعد ملوث ملزمان کے خلاف ایف آئی اے کے ذریعے مزید قانونی اور سخت ترین کارروائی عمل میں لائی جائے گی۔ ایف آئی اے حکام نے واضح کیا ہے کہ عوام الناس کی زندگیوں اور صحت سے کھیلنے والے جعلی ادویات کے مافیا کے خلاف اینٹی کرپشن سرکل کا بلاامتیاز کریک ڈاؤن آئندہ بھی بلا تعطل جاری رہے گا۔

منصور احمد, JULY 31,2026

اسلام آباد (نیوز اینڈ نیوز) — 31 جولائی 2026ء

وفاقی وزیر برائے مواصلات اور استحکامِ پاکستان پارٹی (آئی پی پی) کے صدر عبدالعلیم خان نے ملک میں وسیع پیمانے پر انتظامی اصلاحات کی پرزور حمایت کرتے ہوئے پاکستان کے چاروں صوبوں کو مزید تین تین نئے صوبائی و انتظامی یونٹس میں تقسیم کرنے کی ایک بڑی اور اہم تجویز پیش کر دی ہے۔

سماجی رابطے کی ویب سائٹ ‘ایکس’ (سابقہ ٹوئٹر) پر جاری کردہ اپنے اہم بیانیے میں عبدالعلیم خان نے کہا کہ وفاقی وزیر داخلہ محسن نقوی کی جانب سے انتظامی اصلاحات سے متعلق کی گئی باتیں انتہائی غور طلب اور وقت کی اہم ضرورت ہیں۔ انہوں نے واضح کیا کہ پاکستان کی تیزی سے بڑھتی ہوئی آبادی اور جدید انتظامی ضروریات کے پیشِ نظر اب چاروں صوبوں—پنجاب، سندھ، خیبر پختونخوا اور بلوچستان—کو ‘نارتھ’ (شمالی)، ‘سینٹرل’ (مرکزی) اور ‘ساؤتھ’ (جنوبی) کے نام سے تین تین حصوں میں تقسیم کر دینا چاہیے تاکہ کل 12 انتظامی یونٹس قائم ہو سکیں۔

صدر آئی پی پی عبدالعلیم خان نے وضاحت کی کہ اس جغرافیائی و انتظامی فریم ورک کی بدولت کسی بھی صوبے کا نام تبدیل کرنے کی ضرورت پیش آئے گی اور نہ ہی علاقوں کی تاریخی یا ثقافتی شناخت متاثر ہوگی، بلکہ تمام خطوں کی ثقافتی پہچان مکمل طور پر برقرار رہے گی۔ انہوں نے نشاندہی کی کہ موجودہ نظام کے تحت عام شہریوں کو اپنے بنیادی مسائل اور چھوٹے کاموں کے لیے بھی سینکڑوں کلومیٹر کا طویل و دشوار سفر طے کر کے صوبائی دارالحکومتوں کا رخ کرنا پڑتا ہے۔

انہوں نے کہا کہ اگر مسائل عوام کی دہلیز پر حل ہوں اور نئے صوبے بن جائیں تو اس سے براہِ راست عوام کا فائدہ ہوگا، تاہم اگر اس اقدام سے کسی کی ذاتی یا سیاسی ‘بادشاہت’ پر حرف آتا ہے تو وہ الگ بات ہے، کیونکہ پاکستان ایک جمہوری ملک ہے جہاں بادشاہت کی کوئی گنجائش نہیں ہے۔ عبدالعلیم خان کا کہنا تھا کہ کئی دہائیوں سے نئے صوبوں کی تشکیل کی باتیں محض سیاسی نعروں اور بیانات تک محدود رہیں لیکن اب وقت آ گیا ہے کہ تمام سیاسی قیادت بصیرت کا مظاہرہ کرتے ہوئے ایک پیج پر آئے اور اس وژن کو عملی شکل دے۔ انہوں نے زور دیا کہ نئے صوبوں کی تشکیل سے ملک میں چیف سیکرٹریز، آئی جیز اور ہائی کورٹس عوام کو زیادہ مؤثر اور فوری خدمات فراہم کر سکیں گے جس سے معیشت مستحکم، ترقی متوازن اور قومی یکجہتی مزید مضبوط ہوگی۔