لاہور_خبریں

پنجاب کے دریاؤں میں پانی کا بہاؤ مستحکم؛ دریائے چناب میں سیلابی صورتحال میں کمی، پی ڈی ایم اے کا انتباہ جاری

by

روزینہ اسماعیل, JULY 26,2026

لاہور (نیوز اینڈ نیوز) — 26 جولائی 2026ء

پروونشل ڈیزاسٹر مینجمنٹ اتھارٹی (پی ڈی ایم اے) کے مطابق پنجاب کے دریاؤں میں گزشتہ 24 گھنٹوں کے دوران پانی کا بہاؤ مستحکم رہا ہے جبکہ دریائے چناب کے اپر کیچمنٹس میں بارشیں رکنے کے باعث طغیانی میں نمایاں کمی دیکھنے میں آئی ہے۔ ترجمان کے مطابق دریائے سندھ میں کالا باغ، چشمہ اور تونسہ بیراج کے مقامات پر نچلے درجے کا سیلاب برقرار ہے جہاں پانی کا بہاؤ بالترتیب 3 لاکھ 34 ہزار، 3 لاکھ 70 ہزار اور 3 لاکھ 13 ہزار کیوسک ریکارڈ کیا گیا ہے۔ دریائے چناب میں مرالہ، خانکی، قادر آباد اور تریموں پر سیلابی صورتحال نچلے درجے پر آ گئی ہے، جبکہ دریائے راوی میں بلوکی اور سدھنائی کے مقام پر بھی نچلے درجے کا سیلاب موجود ہے۔ ندی نالوں میں نارووال کے نالہ بسنتر میں درمیانے درجے جبکہ وزیر آباد کے نالہ پلکھو میں 5 ہزار کیوسک کے ساتھ اونچے درجے کا سیلاب رپورٹ ہوا ہے۔ ڈی جی پی ڈی ایم اے عمر عباس میلہ نے دریاؤں کے پاٹ اور نشیبی علاقوں میں موجود شہریوں کو فوری محفوظ مقامات پر منتقل ہونے کی اپیل کرتے ہوئے کہا ہے کہ پنجاب حکومت نے فلڈ ریلیف کیمپس اور تمام بنیادی سہولیات و ادویات کی فرہمی کے انتظامات مکمل کر لیے ہیں۔

پاکستان اور لیبیا کے درمیان تجارتی حجم 1 ارب ڈالر تک لے جایا جا سکتا ہے؛ لاہور چیمبر میں اہم سیمینار کا انعقاد

by

منصور احمد, JULY 25,2026

لاہور (نیوز اینڈ نیوز) — 25 جولائی 2026ء

لاہور چیمبر آف کامرس اینڈ انڈسٹری میں “پاکستان لیبیا تجارت اور اقتصادی تعاون کے فروغ” کے عنوان سے ایک سیمینار انعقاد پذیر ہوا، جس کی صدارت صدر ایل سی سی آئی فہیم الرحمن سہگل نے کی جبکہ پاکستان کے نامزد سفیر برائے لیبیا میجر جنرل (ر) ممتاز حسین نے بطور مہمانِ خصوصی شرکت کی۔ اپنے استقبالیہ خطاب میں فہیم الرحمن سہگل نے بتایا کہ مالی سال 2025-26 کے اعداد و شمار کے مطابق دونوں ممالک کے درمیان موجودہ دوطرفہ تجارت انتہائی کم ہے، تاہم اسے باآسانی 1 ارب امریکی ڈالر تک بڑھایا جا سکتا ہے۔ انہوں نے ٹیکسٹائل، سرجیکل آلات، پراسیسڈ فوڈ، آئی ٹی اور تعمیراتی سامان میں وسیع مواقع کی نشاندہی کی۔ تقریب سے خطاب کرتے ہوئے نامزد سفیر میجر جنرل (ر) ممتاز حسین نے کہا کہ لیبیا کی 70 لاکھ کی آبادی اور تعمیرِ نو کے منصوبے پاکستانی تاجروں کے لیے زبردست موقع ہیں۔ انہوں نے انکشاف کیا کہ لکی سیمنٹ لیبیا میں اپنا پلانٹ قائم کرنے کے آخری مراحل میں ہے اور ان کا ہدف اگلے دو سال میں لیبیا کو برآمدات دوگنی کرنے کے ساتھ ساتھ وہاں پاکستانی افرادی قوت کو 20 ہزار سے بڑھا کر 40 ہزار تک پہنچانا ہے۔

ملکی ترقی کا انحصار برآمدات اور جدید ٹیکنالوجی پر ہے؛ احسن اقبال کا ایکسپو سینٹر لاہور میں الیکٹرک وہیکلز اور گرین انرجی نمائش سے خطاب

by

منصور احمد, JULY 25,2026

لاہور (نیوز اینڈ نیوز) — 25 جولائی 2026ء

وفاقی وزیر منصوبہ بندی و ترقی احسن اقبال نے کہا ہے کہ پاکستان کی معاشی خود مختاری، پائیدار ترقی اور مستقبل کا انحصار درآمداتی انحصار ختم کر کے ‘ڈالر کمانے والی’ برآمداتی معیشت کی تشکیل پر ہے۔ ایکسپو سینٹر لاہور میں جدید الیکٹرک وہیکلز اور توانائِی پاکستان نمائش کی تقریب سے بطور مہمانِ خصوصی خطاب کرتے ہوئے انہوں نے اعلان کیا کہ حکومت نے الیکٹرک موٹر سائیکلوں کے فروغ کے لیے 80 ہزار روپے تک سبسڈی سمیت ای وی گاڑیوں پر ڈیوٹیوں میں نمایاں کمی کی ہے تاکہ ٹرانسپورٹ سیکٹر کو برقی توانائی پر منتقل کیا جا سکے۔ انہوں نے کہا کہ پاکستان کو 2035ء تک برآمدات کو 100 ارب ڈالر سے زائد تک پہنچانا ہوگا جبکہ ایف بی آر کے نظام کو مکمل ڈیجیٹلائز اور مصنوعی ذہانت (AI) سے لیس کیا جا رہا ہے تاکہ ٹیکس بیس کو وسیع کیا جا سکے۔ امن و امان کی صورتحال پر بات کرتے ہوئے انہوں نے کہا کہ روایتی جنگ میں دندان شکن شکست کے بعد بھارت اب فتنة الہندوستان کے ذریعے غیر روایتی دہشت گردی کی لہر کو ہوا دے رہا ہے، جسے قوم کے تعاون سے ناکام بنایا جائے گا۔ وفاقی وزیر نے امریکہ اور ایران کے مابین کشیدگی کے عالمی معیشت اور تیل کی قیمتوں پر اثرات کا ذکر کرتے ہوئے امید ظاہر کی کہ دونوں ممالک مذاکرات کے ذریعے پائیدار امن کی طرف لوٹیں گے۔

ایف آئی اے کا ایجنٹ مافیا کے خلاف کریک ڈاؤن جاری، لاہور میں 7 ایجنٹ گرفتار

by

منصور احمد, JULY 25,2026

اسلام آباد (نیوز اینڈ نیوز) — 25 جولائی 2026ء

فیڈرل انویسٹی گیشن ایجنسی (ایف آئی اے) اینٹی کرپشن سرکل لاہور نے ایجنٹ مافیا کے خلاف کارروائیاں تیز کرتے ہوئے انٹر بورڈز کوآرڈینیشن کمیشن (آئی بی سی سی) کے لاہور آفس کے باہر چھاپہ مار کر 7 ملزمان کو گرفتار کر لیا ہے۔ ترجمان ایف آئی اے لاہور زون کے مطابق گرفتار کیے گئے ملزمان میں وسیم سلیم، عدنان سلیم، عاصم سلیم، عبدالوحید، ندیم کلیم، عمار علی بھٹی اور بلال سعید شامل ہیں، جن کا تعلق لاہور کے مختلف علاقوں سے ہے۔ ابتدائی تحقیقات سے معلوم ہوا ہے کہ یہ ملزمان شہریوں اور طلباء کو آئی بی سی سی کے ذریعے تعلیمی اسناد کی فوری تصدیق کروانے کا جھانسہ دے کر غیر قانونی طور پر اضافی اور من مانی رقم وصول کر رہے تھے۔ چھاپے کے دوران ایف آئی اے ٹیم نے ملزمان کے قبضے سے متعدد طلباء کی تعلیمی اسناد، لیپ ٹاپس اور اہم شواہد برآمد کر لیے ہیں۔ ایف آئی اے حکام کے مطابق تمام گرفتار ملزمان کے خلاف کیس درج کر کے مزید تفتیش کا آغاز کر دیا گیا ہے تاکہ اس نیٹ ورک کے دیگر سہولت کاروں کو بھی قانون کے کٹہرے میں لایا جا سکے۔