newsandnews.org

کاشف عباسی ,May 12 ,2026

اسلام آباد (نیوز اینڈ نیوز) — امریکہ اور ایران کے درمیان مذاکرات میں تعطل کے آثار نمایاں ہونے کے بعد پاکستان نے خطے میں کشیدگی کم کرنے کے لیے اپنی سفارتی کوششیں مزید تیز کر دی ہیں۔ یہ صورتحال اس وقت سامنے آئی جب امریکی صدر ڈونلڈ ٹرمپ نے تہران کی جانب سے پیش کیے گئے تصفیہ فریم ورک کو مسترد کر دیا۔

رپورٹس کے مطابق پیر کے روز خطے میں اہم سفارتی سرگرمیاں جاری رہیں جبکہ فوجی دباؤ اور دوبارہ محاذ آرائی کے خدشات بھی بڑھنے لگے ہیں۔ پاکستان اس دوران ایک باضابطہ ثالث کے طور پر مختلف ممالک کے ساتھ رابطوں میں مصروف ہے۔

امریکی صدر ڈونلڈ ٹرمپ نے ایران کے جواب کو “مکمل طور پر ناقابل قبول” قرار دیتے ہوئے کہا کہ دونوں ممالک کے درمیان اختلافات کی خلیج بہت وسیع ہے۔ فاکس نیوز کو انٹرویو دیتے ہوئے انہوں نے جنگ بندی کی صورتحال کو شدید خطرے میں قرار دیا اور کہا کہ یہ ایسے ہے جیسے کسی مریض کے بچنے کے امکانات صرف ایک فیصد رہ جائیں۔

ٹرمپ نے یہ بھی عندیہ دیا کہ امریکہ آبنائے ہرمز کے ذریعے گزرنے والے تیل بردار اور تجارتی جہازوں کے تحفظ کے لیے فوجی آپریشن دوبارہ شروع کرنے پر غور کر رہا ہے، تاہم اس حوالے سے ابھی حتمی فیصلہ نہیں کیا گیا۔

اس صورتحال کے تناظر میں پاکستان کا دفتر خارجہ مسلسل سفارتی رابطے کر رہا ہے۔ امریکی ناظم الامور نیٹلی بیکر نے نائب وزیراعظم و وزیر خارجہ اسحاق ڈار سے ملاقات کی جس میں خطے کی بدلتی صورتحال پر تبادلہ خیال کیا گیا۔

اسحاق ڈار نے سعودی وزیر خارجہ فیصل بن فرحان آل سعود سے بھی ٹیلیفونک رابطہ کیا اور علاقائی استحکام کے لیے جاری سفارتی کوششوں پر گفتگو کی۔ ذرائع کے مطابق پاکستان خلیجی ممالک اور دیگر بین الاقوامی اداروں کے ساتھ بھی رابطے میں ہے تاکہ کشیدگی میں کمی لائی جا سکے۔

ایرانی وزارت خارجہ کے ترجمان کا کہنا ہے کہ کئی متعلقہ ممالک ایران سے رابطے کر رہے ہیں جبکہ اسلام آباد اب بھی اس معاملے میں ایک فعال ثالثی کردار ادا کر رہا ہے۔

دوسری جانب اقوام متحدہ کے ایک اہلکار نے خبردار کیا ہے کہ اگر آبنائے ہرمز میں تعطل پیدا ہوا تو عالمی سپلائی چین متاثر ہو سکتی ہے جس کے نتیجے میں دنیا بھر میں لاکھوں افراد کو خوراک اور توانائی کے بحران کا سامنا کرنا پڑ سکتا ہے۔

محمود احمد May11,2026

لندن، نیوز اینڈ نیوز:
برطانیہ نے ایران سے منسلک تنظیموں اور مبینہ جرائم پیشہ نیٹ ورکس کے خلاف نئی پابندیوں کا اعلان کر دیا ہے۔ برطانوی وزارتِ خارجہ کے مطابق ان پابندیوں کا مقصد برطانیہ، یورپ اور مشرقِ وسطیٰ کی سلامتی کو مزید مضبوط بنانا اور خطے میں غیرقانونی سرگرمیوں کی روک تھام یقینی بنانا ہے۔

برطانوی حکام کا کہنا ہے کہ ایرانی ریاست سے منسلک بعض گروہ یورپ اور امریکا میں غیرقانونی سرگرمیوں، مالی جرائم اور سلامتی کے لیے خطرات پیدا کرنے میں ملوث پائے گئے ہیں۔ اسی تناظر میں متعدد افراد، تنظیموں اور نیٹ ورکس پر سفری پابندیاں، اثاثے منجمد کرنے اور مالی لین دین محدود کرنے جیسے اقدامات کیے گئے ہیں۔

وزارتِ خارجہ کے بیان میں کہا گیا کہ برطانیہ اپنے اتحادی ممالک کے ساتھ مل کر عالمی سلامتی کو درپیش خطرات کے خلاف کارروائیاں جاری رکھے گا اور کسی بھی ایسے نیٹ ورک کو برداشت نہیں کیا جائے گا جو خطے کے امن و استحکام کے لیے خطرہ بنے۔

دوسری جانب ایرانی حکام کی جانب سے فوری طور پر ان پابندیوں پر باضابطہ ردعمل سامنے نہیں آیا، تاہم ماضی میں تہران مغربی ممالک کے ایسے الزامات کو مسترد کرتا رہا ہے۔ سیاسی مبصرین کے مطابق برطانیہ کے اس اقدام سے ایران اور مغربی ممالک کے درمیان پہلے سے موجود کشیدگی میں مزید اضافہ ہو سکتا ہے۔

کاشف عباسی ,May 11 ,2026

:واشنگٹن / اسلام آباد نیوز اینڈ نیوز

امریکی صدر ڈونلڈ ٹرمپ نے خلیجی تنازع کے خاتمے کے لیے ایران کی جانب سے پاکستانی ثالثوں کے ذریعے بھیجے گئے جواب کو “مکمل طور پر ناقابل قبول” قرار دیتے ہوئے مسترد کر دیا، جس کے بعد خطے میں سفارتی کشیدگی مزید بڑھ گئی ہے۔

صدر ٹرمپ نے اپنے سوشل میڈیا پلیٹ فارم “ٹروتھ سوشل” پر جاری بیان میں کہا کہ انہوں نے ایران کے نام نہاد نمائندوں کا جواب پڑھ لیا ہے، لیکن یہ انہیں بالکل پسند نہیں آیا۔ انہوں نے اسے “TOTALLY UNACCEPTABLE” قرار دیتے ہوئے واضح کیا کہ امریکہ ایران کی شرائط قبول کرنے کے لیے تیار نہیں۔

ایرانی سرکاری میڈیا کے مطابق تہران نے اپنے جواب میں لبنان میں جاری جنگ کے خاتمے، آبنائے ہرمز میں جہاز رانی کے تحفظ اور خطے میں دشمنی کم کرنے پر زور دیا ہے، جبکہ پابندیوں میں نرمی اور ایٹمی تنازع جیسے حساس معاملات کو بعد کے مرحلے کے لیے مؤخر رکھنے کی تجویز دی گئی۔

اسلام آباد میں معرکۂ حق کی پہلی سالگرہ کے موقع پر منعقدہ تقریب سے خطاب کرتے ہوئے وزیراعظم شہباز شریف نے انکشاف کیا کہ فیلڈ مارشل عاصم منیر نے انہیں آگاہ کیا ہے کہ “ایران کا جواب موصول ہو چکا ہے”۔ وزیراعظم نے نائب وزیراعظم اسحاق ڈار اور فیلڈ مارشل عاصم منیر کی سفارتی کوششوں کو سراہتے ہوئے کہا کہ پاکستان خطے میں امن کے لیے فعال کردار ادا کر رہا ہے۔

ایرانی صدر مسعود پزشکیان نے بھی واضح کیا کہ مذاکرات کا مطلب “ہتھیار ڈالنا یا پسپائی اختیار کرنا نہیں” بلکہ برابری اور احترام کی بنیاد پر مسائل کا حل تلاش کرنا ہے۔

دوسری جانب ایران کے سپریم لیڈر آیت اللہ خامنہ ای نے عسکری قیادت سے اہم ملاقات کی، جبکہ امریکی اتحادیوں کو مختلف مقامات پر ڈرون حملوں کا سامنا بھی کرنا پڑا۔ ایرانی حکام نے خبردار کیا ہے کہ تہران کا “صبر ختم ہو چکا ہے” اور مسلسل جنگ بندی خلاف ورزیوں کے نتائج سنگین ہو سکتے ہیں۔

ادھر قطر کے وزیراعظم نے واشنگٹن میں اہم ملاقاتوں کے بعد وزیراعظم شہباز شریف سے ٹیلیفونک رابطہ کرکے خطے میں جاری سفارتی کوششوں اور امن کی صورتحال پر تبادلہ خیال کیا۔

محمود احمد May10,2026

واشنگٹن / تہران: امریکہ اور ایران کے درمیان کشیدگی کم کرنے اور ممکنہ امن معاہدے کیلئے 30 روزہ مذاکراتی دور کی تجویز سامنے آگئی، جبکہ عالمی میڈیا نے 14 نکاتی خفیہ پلان کی تفصیلات بھی جاری کر دیں۔

رپورٹس کے مطابق مجوزہ پلان کے تحت ایران کو 60 فیصد افزودہ تقریباً 440 کلوگرام یورینیم بین الاقوامی نگرانی میں حوالے کرنا ہوگا، جبکہ اس کے بدلے امریکہ مرحلہ وار ایران پر عائد اقتصادی پابندیاں نرم کرے گا۔

خفیہ پلان میں ایرانی تیل کی برآمدات پر نرمی، بینکاری پابندیوں میں جزوی کمی اور بیرون ملک منجمد اربوں ڈالر مالیت کے ایرانی اثاثوں کی بحالی بھی شامل ہے۔ ذرائع کے مطابق مجوزہ معاہدے کا مقصد مشرق وسطیٰ میں بڑھتی کشیدگی کم کرنا اور ایران کے جوہری پروگرام پر نیا فریم ورک طے کرنا ہے۔

عالمی میڈیا کے مطابق مذاکرات کے دوران جنگ بندی، خلیج میں بحری کشیدگی میں کمی اور قیدیوں کے تبادلے جیسے معاملات بھی زیر غور آئیں گے۔ تاہم ایران نے تاحال پلان کی تمام شقوں پر باضابطہ رضامندی ظاہر نہیں کی۔

ادھر امریکی حکام کا کہنا ہے کہ سفارتی حل اب بھی ترجیح ہے، جبکہ ایران نے واضح کیا ہے کہ قومی خودمختاری اور دفاعی مفادات پر کوئی سمجھوتہ نہیں کیا جائے گا۔

10,May 2026 (نیوز اینڈ نیوز)

اسلام آباد, پاکستان تحریک انصاف نے 9 مئی 2023ء کو پاکستان کی سیاسی تاریخ کے سیاہ ترین دنوں میں سے ایک قرار دیتے ہوئے مطالبہ کیا ہے کہ ان واقعات کی شفاف، غیرجانبدار اور آزادانہ تحقیقات کیلئے ایک بااختیار عدالتی کمیشن قائم کیا جائے۔

تحریک انصاف کے مرکزی سیکرٹری اطلاعات شیخ وقاص اکرم نے اپنے بیان میں کہا کہ بانی چیئرمین عمران خان کی اسلام آباد ہائی کورٹ کے احاطے سے گرفتاری نہ صرف عدلیہ کے تقدس کی خلاف ورزی تھی بلکہ اس نے ریاستی جبر اور آمریت کی خطرناک مثال قائم کی۔

انہوں نے کہا کہ 9 مئی کے واقعات کی حقیقت سامنے لانے، ذمہ داران کا تعین کرنے اور انصاف کی فراہمی کیلئے سپریم کورٹ کے حاضر سروس سینئر ججز پر مشتمل عدالتی کمیشن فوری طور پر تشکیل دیا جائے۔

شیخ وقاص اکرم نے سی سی ٹی وی فوٹیج غائب ہونے پر بھی شدید تحفظات کا اظہار کرتے ہوئے کہا کہ اہم شواہد کا منظرعام پر نہ آنا تحقیقات کی شفافیت پر سوالیہ نشان ہے۔ انہوں نے مطالبہ کیا کہ 9 مئی سے متعلق تمام سی سی ٹی وی فوٹیجز فوری طور پر عوام کے سامنے لائی جائیں۔

انہوں نے عمران خان، بشریٰ بی بی اور 9 مئی کے بعد گرفتار ہونے والے تمام کارکنوں، خصوصاً خواتین، کی فوری رہائی کا مطالبہ بھی کیا۔

دوسری جانب تحریک تحفظ آئین پاکستان کے ترجمان حسین احمد یوسفزئی نے بھی کہا کہ 9 مئی کے واقعات کو سیاسی مخالفین کے خلاف کارروائیوں کیلئے جواز کے طور پر استعمال کیا گیا، جس سے جمہوری آزادیوں، انسانی حقوق اور سیاسی عمل کو شدید نقصان پہنچا۔